(Bu sayfa şu anda yalnızca Esperanto dilinde mevcuttur.)
Ĉe JES 2025/’26 okazos pluraj ekskursoj. La plejparto de ili okazos paralele, dum la oficiala “ekskursa tago”, la 2a de januaro. (Sed estas unu ekskurso kiu escepte okazos jam la 31an de decembro.) Vi povos elekti kiu(j)n ekskurso(j)n vi volas partopreni, aŭ simple resti trankvile en la ejo.
Bonvolu aliĝi al ekskurso(j) per tiu ĉi formularo:
https://form.jotform.com/253175292846364
1. VINTRA KANUUMADO
+++ jam ne plu restas lokoj +++
Duontaga ekskurso (31 decembro, antaŭtagmezo): Por la aventuremaj, ni proponas unikan sperton: vintra kanuumado en Lübbenau! Sub gvido de lokaj spertuloj, partoprenantoj povos gliti tra la silentaj kanaloj de la Spreewald inter frostaj arboj kaj nebulecaj herbejoj.
- Prezo por persono: 36€
- Aldonaĵoj: +10€ por publika transporto por alveni/foriri (se vi ne jam havas Deutschlandticket)
2. EKSKURSO AL BERLINO
Tuttaga ekskurso (2 januaro): Malkovru la historion de Esperanto en la ĉefurbo de Germanio! Dum ĉi tiu ekskurso ni promenos tra la centra Berlino kaj vizitos lokojn ligitajn al la historio de la lingvo kaj al la pli larĝa internacia kultura movado. Nia urbogvidanto Fritz Wollenberg rakontos pri gravaj eventoj, renkontiĝoj kaj personoj, kiuj kontribuis al la evoluo de Esperanto en la urbo. Post la oficiala parto, eblos resti en Berlino por propra esplorado aŭ por sperti la faman noktan etoson de la urbo.
- Prezo por persono: 10€
- Aldonaĵoj: +10€ por publika transporto por alveni/foriri (se vi ne jam havas Deutschlandticket)
3. MEMOREJO ĈE IAMA KONCENTREJO SACHSENHAUSEN
Tuttaga ekskurso (2 januaro): La vizito al la Memorejo Sachsenhausen en Oranienburg estas profunde reflekta travivaĵo. En tiu iama koncentrejo, funkciinta inter 1936 kaj 1945, oni povos lerni pri la historio de la viktimoj de nazia perforto kaj pri la rolo de la loko dum la postmilita periodo. Ni veturos kune de Burg al Oranienburg (ebla komuna vojaĝo kun la berlina grupo).
- Prezo por persono: senpage (0€)
- Aldonaĵoj: +10€ por publika transporto por alveni/foriri (se vi ne jam havas Deutschlandticket)
4. MARŜADO TRA NATURA REZERVEJO (KAJ VIZITO DE AKVOPARKO)
Tuttaga ekskurso (2 januaro): Amantoj de naturo povos ĝui 20-kilometran marŝadon el Burg ĝis Lübbenau tra la biosfera rezervejo Spreewald, konata pro siaj kanaloj, betuloj kaj malnovaj lignaj pontoj. Dumvoje ni haltos ĉe panoramaj punktoj kaj informtabuloj pri la loka flaŭro kaj faŭno. Post la marŝado, partoprenantoj povos ripozi en la Spreewelten-akvoparko, kie oni naĝas apud pingvenoj malantaŭ vitra muro! Estas grup-tarifo kun rabatoj por studentoj kaj lernantoj. Por tiuj, kiuj preferas pli mallongan tagon, eblas veni per trajno aŭ buso nur por la posttagmeza parto.
- Prezo por persono: senpage (0€)
- Aldonaĵoj:
- +16€ (studentoj) aŭ +20€ (aliaj) por vizito de akvoparko tuj post la marŝado
- +10€ por publika transporto por reveturi fine al la ejo (se vi ne jam havas Deutschlandticket)
5. VARMBANEJOJ DE SPREEWALD
Duontaga ekskurso (2 januaro, posttagmeze): Se vi serĉas ripozon kaj bonfarton, elektu la Spreewald-Therme en Burg. La varmakvaj banejoj, saŭnoj kaj salĉambroj ofertas idealan eblon por malstreĉiĝi post la intensa JES-programo. Tiu duontaga ekskurso taŭgas por ĉiuj aĝgrupoj, aparte por tiuj, kiuj preferas trankvilan tagon sen longaj promenadoj. Surloke estos helpanto por gvidi la grupon kaj certigi, ke ĉiuj komforte alvenas kaj revenas al la kongresejo.
- Prezo por persono: 25€
- Aldonaĵoj: +6€ por povi ankaŭ eniri la saŭnojn
PAGADO
Se aplikeblas, bonvolu ĝiri vian kotizon por ekskurso(j) al jena bankokonto:
Ricevanto: Deutsche Esperanto-Jugend
IBAN: DE47 3702 0500 0008 4249 00
BIC: BFSWDE33XXX
Priskribo: JES 2025 Ekskursoj + [via nomo]